Profesori universitar, Arben Fetoshi, ka thënë se numri i të dënuarve për krimet e luftës së fundit në Kosovë, edhe pas 24-vjetëve është qesharak.
Fetoshi, thotë që është bërë pak në drejtim të akuzave për krime lufte.
“Jemi në kohën kur veçse e kemi tejkaluar çdo limit në kërkim të drejtësisë duke i hetuar dhe ndjekur kryesit e krimeve në Kosovë, për shkak se sa pak është bërë në drejtim të akuzave numër qesharak i të të dënuarve 24-vjet pas, duke pasur parasysh faktin që përgjegjësinë për krimet e luftës e ka pasur UNMIK-u dhe më pas EULEX-u deri në vitin 2018. Në përgjithësi për të gjitha krimet po flas në Kosovë, numri i serbëve të dënuar është simbolik”, tha ai në emisionin “Këndi i Debatit” në Tëvë1.
Sipas Fetoshit, numri i të dënuarve serb dhe atyre shqiptarë për krimet e luftës është i ekuilibruar.
“Unë e kam një dyshim që pothuajse numri i të dënuarve serb dhe të dënuarve shqiptarë për krimet e luftës për fat të keq është i ekuilibruar në qoftë se e shohim regjistrin e rasteve që ka kryer gjyqësori në kohën e administrimit të UNIKU-ut e më pas edhe të EULEX-it”, tha ai.
Profesori universitar, akuzon shtetin për mungesë të mbështetjes për dokumentimin e krimeve të luftës.
“Ne për fat të keq kemi dështuar me Institutin për Hulumtimit e Krimeve të Luftës. Ne për fat të keq ende jemi në përpjekje për me funksionalizuar një institut që në mënyrë serioze do të merrej me dokumentimin e krimeve të luftës në Serbi. Dhe, ne për fat të keq kemi një Prokurori Speciale në të cilën Departamenti për Krimet e Luftës ka vetëm katër prokurorë. Në këtë pikë unë nuk mund të mos them që fajit i ka shteti për mungesën e një suporti më të madh edhe të rritjes së kapaciteteve edhe të mbështetjes më të madhe për këtë departament”, shtoi ai. /teve1.info/
