Zëvendëskryeministri i Maqedonisë së Veriut, Arben Fetai është takuar me ministren e Jashtme, Donika Gërvalla, pas incidentit mes sigurimit të Aeroportit të Shkupit dhe presidentes së Kosovës, Vjosa Osmani.
Fetai ka njoftuar se e informoi Gërvallen se institucionet maqedonase janë duke i kryer hetimet e nevojshme dhe sipas tij, do të ketë përgjegjësi për çdo shkelje “që mund të konstatohet nga incizimet e kamerave të aeroportit”.
“E informova Ministren Gërvalla se institucionet tona janë duke i kryer hetimet e nevojshme dhe se do të ketë përgjegjësi për çdo shkelje që do të mund të konstatohet nga incizimet e kamerave të aeroportit. I dëgjova shqetësimet e Ministres, e cila më njoftoi se sjellje të pahijshme karshi delegacioneve të larta të Republikës së Kosovës ka patur në mënyrë të përsëritur përgjatë viteve nga ana e personelit të sigurisë të angazhuar nga kompania në fjalë.”, shkroi Fetai.
Sigurimi i Aeroportit të Shkupit, sipas Presidencës së Kosovës, dje ka tentuar që me forcë t’ia marrë telefonin presidentes Osmani, e madje sipas tyre, kanë tentuar që ta shtyjnë edhe fizikisht.
Ndryshe, Gërvalla, sot ka bërë të ditur se i ka çuar notë proteste Maqedonisë së Veriut.
