Avokati i Partisë Demokratike të Kosovës (PDK), Faton Fetahu, e ka vlerësuar si të drejtë dhe të pritur vendimin e fundit të Gjykatës Kushtetuese, i cili anulon veprimet e deritanishme në Kuvend dhe konstaton shkelje kushtetuese nga deputetë të mazhorancës.
“Ishte vendim i pritshëm, sepse shkeljet që ndodhën gjatë kësaj periudhe nuk kishin si të trajtoheshin ndryshe përveç si shkelje të Kushtetutës, të shkaktuara nga një vullnet i caktuar politik nga LVV-ja”, deklaroi Fetahu.
Ai theksoi se ky është një nga aktgjykimet më të rëndësishme të Gjykatës Kushtetuese në vitet e fundit, për shkak se lidhet drejtpërdrejt me themelimin e institucionit kyç të vendit – Kuvendit të Kosovës.
“Sot, Gjykata Kushtetuese i ka konfirmuar të gjitha parregullsitë: e ka shpallur jokushtetues votimin e Komisionit të Fshehtë dhe ndërprerjen arbitrare të seancave nga Avni Dehari. Po ashtu, ka sqaruar se e drejta e grupit më të madh për të propozuar kandidatin për kryetar Kuvendi nuk është absolute, por relative dhe e kufizuar në kohë”, theksoi avokati i PDK-së. /teve1.info/
