Të enjten paralajmëruan tërheqjen nga garat. E të premten përmes një konference të jashëzakonshme për gazetarë, i ranë pishman, e thanë që po ju kthehen garave.
Drejtuesit e Feronikelit, para gazetarëve e tifozëve vendës, “Tigrat e Zi”, vendosën të vazhdojnë garat, vetëm një ditë pasi të pakënaqur me ndarjen e drejtësisë, reaguan ndaj gjyqtarëve e Federatës, për padrejtësitë, në drjetim të tyre.
Në konferencën e mbajtur në stadiumin “Rexhep Rexhepi”, kryetari i klubit, Endrit Krasniqi, konfirmoi se Feronikeli 74 do të vazhdojë garat.
Krasniqi ka akuzuar disa gjyqtarë që janë kundër klubit ndaj të cilëve edhe kanë bërë kallëzime penale.
Për situatën e krijuar foli edhe kapiteni Lapidar Lladrovci i cili u shpreh se klubi nga Drenasi është prej skuadrave më të dëmtuara në ligë.
“Por për hir të futbollit e tifozëve, kemi vendosur të mbesim në ligë”, ka thënë Lladrovci, i cili kërkoi nga Federata e Futbollit të merr masa ndaj gjyqtarëve.
Gjatë gjithë kohës në tribuna kanë qëndruar tifozët e Feronikelit, të njohur si “Tigrat e Zi”, të cilët edhe kanë pasur parulla në duar me portretin e kryetarit të FFK-së, Agim Ademi, të cilin edhe e e kanë ofenduar bashkë me FFK-në.
Feronikeli 74 vendosi të enjten të tërhiqet nga garat pasi pretendoi se është dëmtuar nga gjyqtarët në 11 javët e para të Superligës. Klubi nga Drenasi është i vetmi pa fitore këtë edicion, teksa ka vetëm tri barazime.
Nikli të shtunën e pret Ballkanin nga ora 13:00.
