Skuadra e Ferizajt që bën gara në Superligën e Kosovës në futboll, është forcuar me qendërmbrojtësin brazilian, Guilherme Souza.
Lajmin e ka bërë të ditur klubi ferizajas të enjten kurse Souza do të jetë pjesë e ekipit deri në fund të këtij sezoni.
Souza si lojtar është zhvilluar në akademinë e Corinthiansit, ndërsa ka luajtur edhe te Fluminense në Brazil dhe Gil Vicente në Portugali. Së fundmi, ai ishte pjesë e ekipit nga Azerbajxhani, Imishlit.
“Me ardhjen e Guilhermes ne kemi plotësuar një boshllëk në vijën e fundit, e që kjo ishte edhe kërkesë direkte e kryetrajnerit Abazi”, ka shkruar Ferizaj në njoftim.
Ferizaj është rikthyer këtë sezon në elitën e futbollit kosovar dhe pas katër ndeshjeve të luajtura ka tubuar po aq pikë dhe zë vendin e shtatë në tabelë.
Ndeshjen e radhës, Ferizaj e luan të shtunën në shtëpi kundër skuadrës së Suharekës.
