Volejbollistet e ekipit nga Ferizaj, Fer Volley synojnë një tjetër paraqitje dinjitoze në garat evropiane, si dhe kalimin në raundin tjetër të CEV Challenge Cup.
Pas humbjes javën e shkuar në Zvicër nga Dudingeni 3:1 në sete, Fer Volley luan ndeshjen e kthimit në palestrën “Bill Clinton” në Ferizaj, sot prej orës 20:00.
Krahas përkrahjes së madhe nga tribunat, Fer Volley kërkon përmbysjen e madhe ndaj Dudingenit, ekip të cilin synon ta eliminojë për të siguruar kualifikimin historik në raundin tjetër të kësaj gare.
“Një sfidë e madhe, një mbrëmje që kërkon zemër, pasion dhe publikun tonë pranë”, ka shkruar ndër të tjera Fer Volley në postimin e bërë në Facebook.
Përballjet mes këtyre dy ekipeve, janë të vlefshme në kuadër të rrethit të 32 ekipeve, të cilat janë pjesë e raundit të parë kualifikues të CEV Challenge Cup.
