Deputetja e Lëvizjes Vetëvendosje, Arjeta Fejza, ka folur për zhvillimet e fundit politike lidhur me zgjedhjen e presidentit të Kosovës.
E ftuar në emisionin “Ditari” në Tëvë1, Fejza ka komentuar deklaratën e kryeministrit Albin Kurti, i cili ka përmendur Bekim Sejdiun si një prej emrave të mundshëm për kandidat për president.
Ndërkohë, Sejdiu ka bërë të ditur përmes një postimi në Facebook se është tërhequr nga gara për president.
Megjithatë, Fejza ka thënë se tërheqja e Sejdiut nuk nënkupton se ai nuk dëshiron të jetë president apo të shërbejë në Republikën e Kosovës. Sipas saj, arsyeja kryesore lidhet me mungesën e votave.
“Ajo që është tepër e rëndësishme është se profesori nuk ka dhënë dorëheqje, që nuk do të jetë president, as nuk dëshiron që të shërbejë në Republikën e Kosovës. Arsyeja pse është tërhequr është se ka të bëjë me mungesën e votave. Prandaj edhe LDK-ja, pjesa që janë deklaruar për Bekim Sejdiun, janë në seancë. Mundësia dhe kuorumi i takon Albin Kurtit edhe Abdixhikut që të bisedojnë përsëri me z. Sejdiu dhe vendit t’i japin presidentin”, ka deklaruar Fejza.
Ajo ka theksuar se për zgjedhjen e presidentit, sipas saj, nuk kërkohen votat e deputetëve të PDK-së, por vetëm pjesëmarrja e disa prej tyre në sallë për të mundësuar kuorumin.
“Ajo që neve na duhet është vetëm pjesëmarrja në seancë. Nuk po kërkojmë as votën e deputetëve të PDK-së, vetëm prezencën e disa prej tyre në sallë. Edhe një herë po e ritheksoj se Sejdiu nuk është tërhequr sepse nuk ka dashur të jetë kandidat për president, por vetëm se nuk i ka pasur votat”, është shprehur Fejza.
Fejza ka folur edhe për deklaratat e fundit të kryetarit të PDK-së, Bedri Hamza, pas konferencës së kryeministrit Albin Kurti.
Ajo ka thënë se Hamza duhet ta pranojë ftesën e Kurtit për takim.
“Unë e pashë edhe konferencën e kryetarit të PDK-së. Ai tha se duhet të takohemi, mirëpo ai duhet njëherë ta pranojë ftesën e Kurtit për t’u takuar”, tha Fejza.
Duke folur për përfundimin e afatit dhe situatën e krijuar rreth zgjedhjes së presidentit, Fejza ka bërë të ditur se pritet të ketë seancë edhe gjatë orëve të mbetura.
“Do të ketë seancë edhe në këto orët e mbetura. Do të mundohemi të bëjmë zgjedhjen e presidentit. Unë pres që në orët në vazhdim të kemi një seancë sot”, ka deklaruar Fejza.
