Deputetja e Lëvizjes Vetëvendosje, Ardita Fejza, ka thënë se rreziku në veri vazhdon të jetë evident pavarësisht punës dhe rritjes së monitorimit nga institucionet e Kosovës.
Sipas Fejzës kjo ndodh për shkak të qasjes së Serbisë në raport me Radoiçiqin, për shkak të gjuhës kërcënuese të Serbisë ndaj Kosovës si dhe për shkak të lëvizjeve të Serbisë me ushtrinë afër kufirit.
“Pavarësisht një pune të jashtëzakonshme nga të gjitha institucionet tona në ballafaqim sidomos me sulmin e fundit terrorist përfshirë këtu edhe ndërmarrjet tona publike, institucionet tona të sigurisë, intelegjencën e të gjitha këto prapëseprapë është vështirë e konkurueshme imagjinata e një shteti demokratik i cili funksionon mbi parimet e demokracisë me imagjinatën e terroristëve dhe kriminelëve.
Pra sulme terroriste ka në gjithë botën fatkeqësisht, mirëpo ajo që është e rëndësishme është sesi i kundërpërgjigjen institucionet këtyre sulmeve, tek ne pavarësisht që institucionet janë në krye të detyrës është rritur monitorimi rreziku vazhdon të jetë evident për arsye të cilat dihen. E para qasja e Serbisë në raport me kriminelin Radoiçiq i cili e pranon se e ka organizuar sulmin terrorist që kishte për qëllim aneksimin e veriut, gjuha e vazhdueshme kërcënuese e Serbisë në raport me territorin e Kosovës një gjuhë që flet vazhdimisht për luftë, lëvizjet e tyre me ushtrinë afër kufirit, pra e gjithë kjo vazhdon ta ketë peshën e vet dhe vazhdon që ta ketë rrezikun për situatën në terren”, ka deklaruar ajo në emisionin “Ditari”, në Tëvë1.
Ndryshe, të hënën (2 dhjetor), Prokuroria Speciale bëri të ditur se lidhur me sulmin terrorist të 29 nëntorit në kanalin e ujit të “Ibër-Lepencit”, ishin shoqëruar në Polici 10 të dyshuar. Prej tyre, Dragisha Viqentijeviq, dhe D.M., u ndaluan, ku të parit iu caktua masa e paraburgimimit, ndërsa i dyti është liruar në procedurë të rregullt.
Kurse, më 1 dhjetor u ndalua edhe Jovan Viqentijeviq, të cilit i janë sekuestruar armë e pajisje tjera në shtëpi.
ShpërthimiN në kanalin e ujit të Ibër-Lepencit në fshatin Varagë të Zubin-Potokut, i cili dyshohet se u bë me rreth 20 kilogramë eksploziv, autoritetet e Kosovës e kanë cilësuar si sulm terrorist dhe se përgjegjëse thanë se është Serbia. Sulmin e kanë dënuar ashpër edhe ndërkombëtarët.
Lidhur me këtë rast gjatë kontrolleve në veri, Policia ka sekuestruar armë, municion, e pajisje tjera./teve1.info/
