Arjeta Fejza nga Lëvizja Vetëvendosje ka kritikuar Lidhjen Demokratike të Kosovës lidhur me ankesën e saj në Panelin Zgjedhor për Ankesa dhe Parashtresa (PZAP), e cila kundërshton vendimin e Komisionit Qendror të Zgjedhjeve për hapjen e qendrave të votimit jashtë përfaqësive diplomatike.
Në emisionin “Ditari” në Tëvë1, Fejza ka thënë se qëndrimi i LDK-së tregon një qasje problematike ndaj mërgatës dhe, sipas saj, pasqyron një frikë politike të kësaj partie.
Fejza ka theksuar se mërgata, në shumicën dërrmuese, mbështet Vetëvendosjen, dhe se pikërisht kjo sipas saj qëndron pas reagimeve të LDK-së.
“Ankesa e LDK-së, që nga momenti kur është caktuar data e zgjedhjeve, po tregon një qasje problematike në raport me mërgatën. Siç duket, ajo po vazhdon avazin e saj të dyshimeve dhe dilemave, të cilat besoj se lidhen edhe me faktin se tashmë dihet që mërgata, në shumicë dërrmuese, e mbështet Lëvizjen Vetëvendosje. Këto veprime të LDK-së janë vetëm duke çuar ujë në mullirin që e pengon lehtësimin e pjesëmarrjes së mërgatës në procesin zgjedhor”, ka deklaruar ajo.
Ajo ka konsideruar se ankesat e LDK-së po shprehin paranojë lidhur me pretendimet për manipulim apo keqpërdorim të votës.
“Ky qëndrim i LDK-së për ne nuk është i ri, megjithëse vazhdon të jetë i pakuptueshëm. LDK-ja po shfaq një lloj paranoje lidhur me aludimet e saj për manipulim të votave. Mendoj se qëndrimi i tyre është më shumë një reflektim i botëkuptimit të tyre për atë se çfarë mendojnë se mund të ketë ndodhur në këtë proces, sesa ndonjë tregues real se vota e mërgatës mund të keqpërdoret apo manipulohet”, ka përfunduar Fejza.
Ndryshe, Paneli Zgjedhor për Ankesa dhe Parashtresa (PZAP) ka pranuar ankesën e Lidhjes Demokratike të Kosovës (LDK), duke e rrëzuar vendimin e Komisionit Qendror të Zgjedhjeve për hapjen e qendrave të votimit jashtë përfaqësive diplomatike.
Me këtë vendim, PZAP rikthen praktikën që votimi jashtë vendit të zhvillohet vetëm në ambasadat dhe konsullatat e Kosovës, për zgjedhjet e 28 dhjetorit 2025.
Sipas vendimit PZAP pranon ankesën e LDK-së, ndërkaq ndryshon vendimin e KQZ-së të 26 nëntorit.
Qendrat e votimit jashtë vendit do të jenë vetëm në përfaqësitë diplomatike të Kosovës ose hapësirat e tyre, ndërsa eliminohet mundësia për qendra votimi në lokacione të tjera shtesë.
PZAP thotë se KQZ ka shkelur ligjin duke miratuar hapjen e qendrave të reja jashtë misioneve diplomatike.
Paneli thekson se nuk janë respektuar: Neni 96(3) i Ligjit për Zgjedhjet e Përgjithshme si dhe Neni 2.2 i Rregullores 05/2024 për qendrat e votimit.
