FC Schaffhausen po përgatitet të përforcojë skuadrën me gjak të ri, ndërsa në fokus është talenti kosovar Dior Gërbovci. Sipas raportimit të portalit zviceran “4-4-2.ch”, klubi nga kategoria e dytë futbollit zviceran e njohur si “Promotion League” ka shprehur interes konkret për mesfushorin kreativ të ekipit U21 të Grasshopper Club Zürich.
Gërbovci, 19-vjeçar dhe ish-lojtar i Kombëtares së Kosovës U19, ka qenë pjesë e stërvitjeve me FC Schaffhausen gjatë muajve nëntor dhe dhjetor, duke lënë përshtypje pozitive te stafi teknik. Tashmë, gjithçka tregon se kalimi i tij i përhershëm te skuadra e njohur si “Munotstädter” është vetëm çështje kohe.
Mesfushori njihet për teknikën e lartë, kreativitetin dhe inteligjencën në lojë. Rrugëtimi i tij futbollistik ka nisur shumë herët, në moshën katërvjeçare te FC Glattbrugg, për t’u transferuar në vitin 2014 te Grasshopper Club Zürich. Atje, Gërbovci ka kaluar të gjitha kategoritë e akademisë, duke u formuar për nëntë vite si një nga talentet premtuese të klubit.
Pas emërimit të David Sesa si trajner i ri, FC Schaffhausen synon një kthesë sportive dhe afrime të targetuara. Transferimi i mundshëm i Gërbovcit shihet si një hap strategjik për të rritur cilësinë në mesfushë dhe për të përmirësuar pozitën e ekipit, i cili aktualisht renditet i 12-ti në Promotion League.
Me këtë lëvizje, FC Schaffhausen dërgon një sinjal të qartë për ambiciet e tij, ndërsa për Dior Gërbovcin kjo mund të jetë mundësia ideale për të hedhur hapin e radhës në karrierën e tij profesionale.
