Egzon Belica është përfocimi më i ri i klubit të futbollit Prishtina. Mbrojtësi shqiptar i Maqedonisë së Veriut me klubin “bardhekaltër” ka nënshkruar kontratë njëvjeçare.
32-vjeçari së fundi ka qenë pjesë e Partizanit të Tiranës, skuadër me të cilën fitoi titullin dhe Superkupën e Shqipërisë.
Futbollisti nga Struga thotë se është nder të luajë për Prishtinën.
“Është nder dhe privilegj të jem pjesë e Prishtinës. Ky klub ka traditë dhe tifozëri të madhe. Tifozët janë pjesë e pandarë e ekipit. Premtimet jepen dhe duhet të mbahen. Jo vetëm unë, mirëpo e gjithë skuadra duhet dhënë 100 % nga vetja për arritjen e objektivave”, ka thënë Belica për faqen e klubit.
Karrierë ka bërë edhe te Rabotniçki, Ohri dhe Shkëndija e Tetovës në Maqedoninë Veriore, ndërsa ka luajtur edhe te Concordia Chiajna në Rumani, Inter Turku në Finlandë dhe Riga në Letoni.
