Stafit të kryetrajnerit Thomas Brdariq te Drenica, të premten iu bashkuan edhe dy trajnerë të tjerë, me përvojë në Gjermani dhe në Evropë.
Joti Stamatopoulos dhe Norman Becker, janë dy ndihmës-trajnerët e ri te Drenica, të cilët sipas klubit nga Skenderaj, do të kompletojnë shtabin teknik.
“Kemi kënaqësinë të njoftojmë se familjes kuq e zi i bashkohen dy emra të njohur të futbollit evropian.
Joti Stamatopoulos – ndihmës trajner me një karrierë të pasur në klube si Fortuna Düsseldorf (Gjermani) dhe Antalyaspor (Turqi), Joti sjell disiplinën dhe taktikën e niveleve më të larta të Bundesligës gjermane dhe Superligës turke.
Norman Becker – trajner i portierëve. Eksperti gjerman vjen pas përvojës së tij të fundit te Hallescher FC. Karriera e tij përfshin punën me portierët në klube elitare si VfL Wolfsburg, RB Leipzig dhe Al-Arabi.
Me ardhjen e tyre, stafi ynë teknik kompletohet edhe më shumë për të ndërtuar një klub futbolli modern dhe profesional”, shkruan në njoftimin e klubit në Facebook.
