Pas një periudhe të vështirë dhe të gjatë rikuperimi, mesfushori Izer Aliu ka marrë lajme pozitive nga klubi i tij. FC Aarau ka vendosur ta lidhë afatgjatë futbollistin 26-vjeçar, duke ia zgjatur kontratën deri në verën e vitit 2028.
Aliu kishte pësuar një dëmtim serioz pothuajse një vit më parë, kur gjatë fitores 1:0 në shtëpi ndaj FC Thun, këputi ligamentin e kryqëzuar të gjurit. Ky lëndim e detyroi atë të mungojë për disa muaj nga fushat e blerta. Megjithatë, gjatë përgatitjeve për pjesën e dytë të sezonit, mesfushori u rikthye sërish në stërvitje dhe në fushë.
Vendimi i klubit për të zgjatur kontratën e ish-juniorit të FC Zürichit u bë publik të mërkurën pasdite dhe shihet si shenjë e besimit të madh që FC Aarau ka ndaj potencialit dhe rëndësisë së Aliut për të ardhmen e ekipit.
Ndërkohë, FC Aarau do ta nisë pjesën e dytë të sezonit këtë të shtunë me një ndeshje në shtëpi ndaj AC Bellinzona. Skuadra e drejtuar nga trajneri Brunello Iacopetta aktualisht renditet në vendin e dytë në tabelë, me tre pikë më pak se lideri FC Vaduz, duke mbajtur ende gjallë ambiciet për ngjitje.
Aliu është zhvilluar si futbollist në Zvicër, ku i kaloi të gjitha grupmoshat, deri në U20.
