Federata e Basketbollit e Kosovës përmes një komunikate të lëshuar ka dënuar sulmin ndaj gjyqtarit Erzen Haxhani që ndodhi gjatë takimit ndërmjet KB Vëllaznimi dhe KB Sigal Prishtina në palestrën “Shani Nushi” në Gjakovë.
FBK ka thënë se sulmi i kryere nga zyrtari i klubit Vëllaznimi është akt i rëndë dhune.
Duke theksuar se mbështet për Shoqatën e Gjyqtarëve të Basketbollit të Kosovës, FBK ka thënë se rasti do të trajtohet me seriozitetin maksimal.
Komunikata e plotë FBK-së:
Federata e Basketbollit e Kosovës dënon në mënyrën më të ashpër të mundshme sulmin fizik të ushtruar ndaj gjyqtarit të ndeshjes Erzen Haxhani gjatë takimit të zhvilluar mbrëmë në kuadër të ProCredit Superligës së Kosovës ndërmjet KB Vëllaznimi dhe KB Sigal Prishtina në palestrën “Shani Nushi” në Gjakovë.
Sulmi i kryer nga zyrtari i KB Vëllaznimi, Jeton Bakalli, është akt i rëndë dhune, i patolerueshëm dhe thellësisht i papranueshëm për sportin dhe për çdo standard të sjelljes institucionale. Ky veprim përbën shkelje serioze të rendit sportiv, cenim të drejtpërdrejtë të integritetit të garës dhe sulm ndaj autoritetit të sistemit të drejtësisë sportive.
Federata e Basketbollit e Kosovës zbaton politikë të qartë dhe absolute të tolerancës zero ndaj çdo forme dhune ndaj zyrtarëve të ndeshjes. Siguria fizike, dinjiteti dhe autoriteti i gjyqtarëve janë të panegociueshme dhe nuk do të vihen në asnjë rrethanë në diskutim.
Federata shpreh mbështetjen e saj të plotë, të fuqishme dhe të pakushtëzuar për Shoqatën e Gjyqtarëve të Basketbollit të Kosovës dhe për të gjithë gjyqtarët, të cilët janë garantues të rregullit, drejtësisë dhe funksionimit normal të garave. Çdo sulm ndaj tyre është sulm ndaj vetë basketbollit të Kosovës.
Rasti do të trajtohet me seriozitet maksimal dhe Federata do të ndërmarrë masa disiplinore të rrepta, në përputhje me rregulloret në fuqi, ndaj çdo individi dhe çdo subjekti që mban përgjegjësi për këtë incident. Çdo akt dhune do të marrë përgjigje të menjëhershme, proporcionale dhe me efekt të qartë ndëshkues dhe parandalues.
Federata pret dhe kërkon përgjegjësi të plotë institucionale nga klubet për sjelljen e zyrtarëve dhe përfaqësuesve të tyre. Organizimi i garave nuk mund të zhvillohet në kushte ku siguria e zyrtarëve vihet në rrezik.
Duhet të jetë e qartë për të gjithë: kush ushtron dhunë nuk ka vend në basketbollin e Kosovës. Pa siguri për gjyqtarët nuk ka garë të rregullt, nuk ka drejtësi sportive dhe nuk ka kampionat.
Federata e Basketbollit e Kosovës mbetet plotësisht e vendosur për të mbrojtur integritetin e garave, autoritetin e gjyqtarëve dhe vlerat themelore të sportit.
Federata e Basketbollit e Kosovës./te
