Kandidati për kryetar të komunës së Mitrovicës së Jugut nga radhët e LVV-Guxo, Faton Peci, ka kryer sot procesin e votimit në shkollën fillore “Bedri Gjinaj”, bashkë me bashkëshorten e tij.
Pas votimit, Peci ka bërë një deklaratë për mediat, ku theksoi rëndësinë e pjesëmarrjes masive të qytetarëve në këto zgjedhje.
“Është një ditë e madhe për Kosovën, pas një dite të mrekullueshme që patëm dje. I ftoj të gjithë qytetarët e Republikës së Kosovës të shfrytëzojnë të drejtën e tyre të votës. Përshtatshëm dhe konkretisht për qytetarët e Mitrovicës, të cilët janë vetëm 10 apo 15 minuta, kjo është një mundësi e madhe për të vendosur për 4 vitet e ardhshme,” tha Peci.
Qytetarët e Republikës së Kosovës ushtrojnë sot të drejtën kushtetuese të votës. Këto janë zgjedhjet e rregullta lokale, të cilat mbahen në 38 komuna të Kosovës.
Numri i qytetarëve me të drejtë vote në vendvotime, sipas të dhënave të KQZ-së është 2 milionë e 69 mijë e 98 votues.
