Nën emocione, u nis drejt vendit ku kaloi fëmijërinë e tij.
Çelësat e pronës e cila i ishte uzurpuar nga serbët para 24 vitesh, tashmë i ka në duar.
E derën e hapë pa ndonjë vështirësi.
Artan Xhaka për herë të parë rrëfen për televizionin, ndjenjat e rikthimit në pronën e tij në Mitrovicë të Veriut, pasi vendimit që morën Gjykata Supreme dhe Agjencia Kosovare për Krahasim dhe Verifikim të Pronave.
“Po ndjesia pak e përzier, por ndjesi e mirë pas 24 vitesh me u kthy qaty ku je rritur, ku je zhvilluar ku ke kriju diçka, dhe pas 24 vitesh po të jepet e drejta me u kthye qaty ku të ka takuar gjithë”, tha pronari i banesës, Artan Xhaka për Tëvë1.
Këtë pronë sipas Xhakës, një serb e mbajti me dokumentacione fals.
“Uzurpatori i ka pas disa dokumente të falsifikuara duke pretenduar se banesa ka qenë e tij, pastaj ne kemi pasë vështirësi institucionale me i ndjekë deri te rikthimi i pronës. Na realisht e kemi ditë, e kishim vendimin e Gjykatës supreme, por thjesht e kemi pritur momentin se si ta marrim. Edhe unë isha pak i njoftuar se uzurpatori është dorëzuar edhe ka vendosur me i kthy çelësat”, tha ai.
Kujtimet e fëmijërisë tashmë për të janë ndryshe.
“Kjo është dhoma e fëmijëve, e jemja, e motrës dhe vëllait, ku e kena kalu jetën më të madhe, edhe normal është nostalgji, ju siç po e shihni duke e shprazët dhoma, mirëpo unë po i shoh elementët e dhomës që kanë qenë mobilet, hapësira ku kemi luajtur, vrapuar, duket pjesë e vogël por e kemi shijuar sa kemi qenë këtu”, tha Xhaka.
E interesimi i serbëve për ta blerë këtë banesë tashmë është rritur.
Por familja Xhaka thotë se një gjë e tillë nuk do të ndodhë.
“Ka qenë si proces shumë i gjatë, po kena pas oferta, kena oferta mirëpo si familje nuk jemi të interesuar me e shit pronën, thjesht me rinovua edhe nëse vazhdon qiky trendi i veriut të jetës më të qetë më në rregull, besoj që edhe banorët nuk do të hezitojnë të kthehen, ndër ta edhe na”, tha Xhaka.
Si kjo familje, në proces të rikthimit të pronave, janë edhe shumë familje të tjera e që AKKVP-ja është në proces të verifikimit.
