Drejtori i Përgjithshëm i Policisë së Kosovës, Kolonel Gazmend Hoxha, i ndau sot medaljen “Mburojë e Policisë” familjes së heroit Afrim Bunjaku.
Sipas njoftimit, drejtori i Përgjithshëm i Policisë Gazmend Hoxha, bashkë me stafin e tij, sot ka vizituar familjen Bunjaku dhe në emër të Policisë së Kosovës ka shprehur ngushëllime për rreshterin Afrim Bunjaku.
“Drejtori i Përgjithshëm i Policisë Kolonel Hoxha, familjes së heroit Afrim Bunjaku i ndau medaljen “Mburojë e Policisë”, si dhe në emër të ministrit të punëve të Brendshme të Republikës së Shqipërisë, Taulant Balla i dorëzoi flamurin e Republikës së Shqipërisë si nderim për veprën heroike të rreshter Afrim Bunjaku”, thuhet në njoftim.
Rreshteri i Policisë së Kosovës, Afrim Bunjaku ra në krye të detyrës më 24 shtator 2023, si pasojë e një sulmi nga një grup terrorist serb në Banjskë të Zveçanit./teve1.info./
