Familjari i rreshterit të vrarë të Afrim Bunjaku, Arton Bunjaku ka reaguar pas aktvendimit të Gjykatës lidhur me rastin e sulmit në Banjska, duke theksuar se drejtësia ende nuk është vendosur plotësisht.
Ai deklaroi se familja ka ndjekur nga afër procesin gjyqësor dhe kishte pritur që të gjithë të akuzuarit të merrnin dënimin e merituar maksimal.
Sipas tij, pritjet mbeten që edhe në fazën e ankesës të ketë vendim që do ta plotësojë drejtësinë.
“Ne e kemi përcjellë për së afërmi aktgjykimin dhe me thënë të drejtën ne kemi pritur që të tretë të marrin dënimin e merituar dhe për të tretë të jetë i dënim i përjetshëm, për të tretin dhe presim tek ankesa që të vendoset edhe ai në pjesën e dënimit të merituar të përjetshëm, nga Bashkësia Ndërkombëtare ne kërkojmë që sa më parë të vije para drejtësisë të gjithë ata që morën pjesë në sulmin e Banjskës dhe ta marrin dënimin e merituar se kështu do të jetë vetëm gjysmakë drejtësia deri në këtë pikë. Sot është një ndjenjë e përzier, duhet ta kuptojnë të gjithë gjë që duhet të bëhen të mirë kuptueshëm të gjithë”, deklaroi ai në emisionin “Ditari” në Tëvë1.
Familjari theksoi gjithashtu se kërkohet angazhim më i madh nga bashkësia ndërkombëtare që të gjithë të përfshirët në këtë rast të dalin para drejtësisë, në mënyrë që, siç u shpreh ai, drejtësia të mos mbetet e anashkaluar.
Ndryshe, sot Gjykata Themelore në Prishtinë ka dënuar me burgim të përjetshëm Bllagoje Spasojeviq, Vlladimir Tolliq, ndërsa 30 vite për Dushan Maksimoviq për sulmin terrorist në Banjskë./teve1.info/
