Policia e Kosovës ka arrestuar tre persona të dyshuar për veprat penale “bashkëkryerje”, “ndihmë”, “mashtrim” dhe “falsifikim të dokumenteve”, pas një hetimi të zhvilluar nga Drejtoria për Hetimin e Krimeve Ekonomike dhe Korrupsionit (DHKEK), përkatësisht Njësia Rajonale për Hetimin e Krimeve Ekonomike dhe Korrupsionit në Prishtinë.
Sipas Policisë, gjatë hetimeve janë siguruar prova dhe informacione që ngjallin dyshime se tre të dyshuarit, meshkuj kosovarë, kanë falsifikuar dokumente të ndryshme zyrtare, përfshirë pasaporta, letërnjoftime dhe certifikata.
“Tre persona të dyshuar meshkuj kosovarë dyshohet se kanë falsifikuar dokumente të ndryshme, si pasaporta, letërnjoftime, certifikata etj., me ç’rast dyshohet se i kanë përdorur si dokumente të vërteta”, thuhet në njoftimin e Policisë.
Autoritetet bëjnë të ditur se dokumentet e falsifikuara dyshohet se janë përdorur për të tentuar shitblerje të kundërligjshme të tokave, me synim përfitimin e një shume prej 1 milion e 550 mijë euro.
“Të dyshuarit me dokumentet e falsifikuara kanë tentuar që në mënyrë të kundërligjshme të bëjnë shitblerje të tokave, me qëllim që të përfitojnë shumën prej 1 milion e 550 mijë euro”, njofton Policia.
Tre të dyshuarit janë intervistuar më 30 korrik 2026 në prani të avokatëve mbrojtës. Pas konsultimit me prokurorin e rastit nga Prokuroria Themelore në Prishtinë, Departamenti i Përgjithshëm, dy prej tyre janë ndaluar për 48 orë, ndërsa i dyshuari i tretë është liruar dhe do të hetohet në procedurë të rregullt.
“Dy nga të dyshuarit janë dërguar në mbajtje prej 48 orësh, ndërsa njëri prej tyre me urdhër të prokurorit është liruar në procedurë të rregullt”, thuhet në njoftimin e Policisë së Kosovës.
