Këtë e ka bërë të ditur përmes një njoftimi Policia e Kosovës, të cilët kanë thënë se personi i dyshuar me veprimet e tij ka përfituar shumën prej rreth dy mijë euro.
“Policia e Kosovës, përkatësisht Drejtoria për hetimin e krimeve ekonomike dhe korrupsionit (DHKEK), Njësia rajonale për hetimin e krimeve ekonomike dhe korrupsionit në Gjilan, në bashkëpunim me Prokurorinë themelore në Gjilan, pas zhvillimit të hetimeve disa mujore ka arritur të sigurojë dëshmi se një zyrtar pranë komunës së Novobërdës ka falsifikuar dokumentacionin zyrtar përkatësisht listën e vijueshmërisë së punëtoreve për paraqitje në punë, me qëllim të përfitimit material dhe se me këto veprime i dyshuari ka kryer veprën penale ‘Falsifikim i dokumentit zyrtar’ e parashikuar në sipas Kodit penal të Republikës së Kosovës. Personi në fjalë, me veprimet e tij dyshohet se ka përfituar shumën prej rreth 2,000 €uro dhe në anën tjetër duke e dëmtuar buxhetin e komunës”, thuhet në njoftim.
Sipas PK-së, i dyshuari me vendim të prokurorit është ndaluar për 48 orë.
“Më datë 10.05.2022, i dyshuari është intervistuar në prezencë të avokatit mbrojtës i caktuar sipas detyrës zyrtare dhe pas përfundimit të intervistës me Aktvendim të prokurorit të shtetit, i dyshuari është ndaluar për 48 orë”, thuhet më tej në njoftimin e Policisë. /teve1.info/
