Fabrika e plastikës në Korroticë të Epërme të Drenasit brenda Parkut të Biznesit u përfshi nga një zjarr masiv, i cili e dogji objektin e tërë. Nga ky zjarr nuk pati viktima, teksa pronarët e fabrikës thonë që dëmet materiale kapin vlerën e miliona eurove.
Njësi të shumta të zjarrfikësve u drejtuan drejt parkut të biznesit në Drenas.
Kjo pasi këtu, fabrika e përpunimit të plastikës, u përfshi nga zjarri.
Në këtë formë, lufta e zjarrfikësve me flakët e zjarrit, filloi në paraditen e së hënës.
Por, materiali i grumbulluar këtu, e bëri edhe më të vështirë shuarjen e zjarrit.
Në vend ngjarje, u panë edhe pronarët e fabrikës, të cilët nuk u prononcuan para kamerës.
Por, sipas tyre dëmi i shkaktuar nga zjarri, kap vlerën e miliona eurove.
E moti me erë, bëri që për pak orë, zjarri të përhapet në tërë fabrikën.
Edhe në orët e pasdites të së hënës, po vazhdojnë përpjekjet e zjarrfikësve për shuarjen e flakëvë të zjarrit, në fabrikën e përpunimit të plastikës në Drenas.
Në vendngjarje u panë edhe zyrtarë të Policisë së Kosovës të cilët konfirmuan që nuk ka viktima nga ky zjarr.
Por nga punëtorët e fabrikës, këta u njoftuan se brenda objektit, ndodhen edhe disa bombola të gazit.
Ky informacion, bëri që menjëherë të rritet perimetri i sigurisë.
E bashkë më të, të zhvendosen edhe ekipet e gazetarëve dhe të pranishmit të tjerë.
Gjatë gjithë kohës në vendngjarje, qëndroi edhe i pari i Drenasit, Ramiz Lladrovci.
Ky njoftoi se për shuarjen e zjarrit kërkoi ndihmë edhe nga KFOR-i.
“Kanë reaguar zjarrfikës të Lipjanit, Malishevës, Prishtinës, Skenderajt. Por unë e kam thirrë edhe ministrin Sveçla edhe i kam kërkuar që ai të lidhet me KFOR-in, që me helikopterë të hidhet ujë”, ka thënë kryetari i Drenasit, Ramiz Lladrovci.
Lladrovci tha se nga ky zjarr, nuk rrezikohen fshatrat përreth.
“Nga zjarri nuk janë të rrezikuara, por nga tymi. Po e shihni që tymi sipas informacioneve, deri në Mitrovicë ka shkuar, Skenderaj dhe Drenasit kanë filluar ankesat”, u shpreh Lladrovci.
Të hënën këtu, u panë edhe pjesëtar të KFOR-it.
Ndërsa deri në orët e pasdites, nuk u bë i ditur shkaktari i zjarrit.
