Dymbëdhjetë automjete të EULEX-it, do t’i dhurohen policisë kufitare të Ukrainës, të cilat janë të ngarkuara edhe me gjëra ushqimore dhe mjete higjienike për t’iu shpërndarë qytetarëve ukrainas.
Shefi i EULEX-it, Lars-Gunnar Wiegemark, tha se Kosova e kupton situatën e vështirë në të cilën ndodhet Ukraina, pasi edhe vet e ka përjetuar atë.
“Secila prej automjeteve është e mbushur me ndihma humanitare, që janë mbledhur e paguar nga stafi ndërkombëtar e lokal që punojnë në EULEX Kosova. Unë jam krenar për stafin dhe iniciativën e tyre për të bërë një praktikë solidariteti me Ukrainën. Ky donacion është vetëm një pjesë e jona për vëllezërit e motrat në Ukrainë. Normalisht që kosovarët e kuptojnë mjaft mirë se çka është të bëhesh refugjat dhe të ballafaqohesh me agresionin”, tha ai.
Edhe Shefi i Zyrës së BE-së, Tomas Szunyog është shprehur krenar që Kosova është rreshtuar krah BE-së në çështjen e Ukrainës.
“Jam krenar që Kosova është rreshtuar në mënyrë të qartë krah BE-së, që do të thotë që jo veç se ka marrë qëndrim të qartë politik por është rreshtuar me sanksione, i ka ndihmuar refugjatëve dhe duke pranuar qëndrimin e gazetarëve ukrainas. Kjo është porosi e fuqishme, ky lloj deklarimi tregon qartë, siç e tha shefi i misionit të EULEX-it, se Kosova e ka vendin në mesin e vendeve të BE-së”, tha Edhe Shefi i Zyrës së BE-së në Kosovë.
Ndërkaq përfaqësuesi kombëtar i kontingjentit të Ukrainës në KFOR, Ivan Nastenko, e falënderoi EULEX-in për ndërmarrjen e kësaj iniciative.
“Jam krenar që shërbej pranë kolegëve ndërkombëtarë që janë të gatshëm gjithmonë të ndajnë barrën dhe të dërgojnë sinjal të qartë të gjithë botës që Ukraina s’është e vetme në këtë luftë… Në emër të popullit të Ukrainës, e falënderoj BE-në për donacionet”, deklaroi ai.
Në donacionin e ndihmave ka rroba, thasë gjumi dhe materiale mjekësore.
Kronika e realizuar nga Valëza Sylejmani
