Ministrja e Drejtësisë, Albulena Haxhiu ka dënuar sulmin e mbrëmshëm ndaj gazetarit, Valon Syla, përcjell teve1.info
Në një konferencë pas mbledhjes së Qeverisë, Haxhiu theksoi se ky sulm është i papranueshëm dhe i patolerueshëm, dhe në të njëjtën kohë uroi që organet përkatëse ta bëjnë punën e tyre.
“Më lejoni që në fillim të fjalës time të shpreh edhe njëherë indinjatën tonë për sulmin e mbrëmshëm ndaj opinonistit dhe gazetarit, Valon Syla. E dënojmë ashpër një veprim të tillë të dënueshëm. Sulmi që ka ndodhur mbrëmë është i papranueshëm, është i patolerueshëm. Dhe urojmë që organet sikurse Policia, Prokuroria dhe Gjykata ta bëjnë punën e tyre me seriozitetin më të lartë dhe jo vetëm ndaj këtij rasti, por ndaj gjitha rasteve ku ka sulme ndaj gazetarëve”, deklaroi ajo.
Siç tha ajo, gazetarët duhet të veprojnë lirshëm dhe liria e shprehjes është e garantuar me Kushtetutën e Kosovës.
Haxhiu po ashtu i uroi urim të shpejtë gazetarit Syla.
Syla është sulmuar mbrëmë nga tre persona dhe për pasojë ka pësuar lëndime të lehta në kokë.
Rreth këtij rasti, hetimet i ka nisur Prokuroria Themelore në Prishtinë. /Teve1.info/
