Escobar në një intervistë për televizionin “N1”, tha se takimi mes Kurtit dhe Vuçiqit ishte shumë profesional dhe i qetë.
“Duhet të them se takimi mes presidentit Vuçiq dhe kryeministrit Kurti ishte vërtet i mirë, shumë profesional dhe i qetë. Ishte inkurajuese të shihje atë nivel të hapjes në praninë e përfaqësuesit të lartë të BE-së, Josep Borrell, dhe Miroslav Lajçak”, tha ai.
Emisari amerikan ka thënë se asnjë njeri nuk duhet të pësojë shkaku i targave dhe se të dyja palët duhet të fokusohen në zgjidhjen evropiane.
“Mendoj se duhet të harrojmë narrativen se ‘Kosova është Serbi’ e të kalojmë në atë që Kosova dhe Serbia janë në të vërtetë Evropë”, ka thënë Escobar.
Ai tha se ka ardhur në vizitë në Kosovë e më pas edhe në Serbi me mesazhin se në bashkësinë ndërkombëtare ka shqetësim të madh për përshkallëzim të mundshëm të dhunës pas masave të reciprocitetit për targa e letërnjoftime që ka marrë Qeveria e Kosovës.
“Gjatë vizitës në Prishtinë, Mitrovicë e Beograd kam krijuar përshtypjen se të gjitha palët janë të përkushtuara për të gjetur një zgjidhje paqësore për këtë krizë. Dhe ky është mesazhi që do t’i dërgoj Washingtonit: besoj se të dyja palët do të gjejnë një zgjidhje kompromisi, e cila do t’ia mundësojë popullit në Kosovë të jetojë në paqe”, ka deklaruar ai.
I pyetur nëse ka paraqitur një propozim për zgjidhjen e çështjes së letërnjoftimeve dhe targave, ai tha se SHBA-ja nuk është pjesë e procesit të dialogut që po zhvillohet nën patronazhin e BE-së.
“Procesi udhëhiqet nga Bashkimi Evropian dhe ne e mbështesim atë proces, kështu që të gjitha propozimet dhe rekomandimet vijnë nga BE-ja”, ka thënë emisari amerikan.
