I dërguari special i ShBA-së për Ballkanin Perëndimor, Gabriel Escobar, ka thënë se autoritetet serbe duhet të lirojnë pa kushte tre zyrtarët policorë të Kosovës, të cilët u rrëmbyen dy ditë më parë në Leposaviq.
Zëvendës Ndihmës Sekretari Amerikan i Shtetit, tha në një bisedë telefonike me gazetarët se ShBA po ndjek “me shumë kujdes” rastin e tre policëve të Kosovës, për të cilët liderët kosovarë thonë që janë rrëmbyer brenda territorit të Kosovës, derisa autoritet serbe pretendon se janë arrestuar në Serbi.
“Për momentin nuk i kemi të gjitha faktet dhe për këtë arsye nuk po bëjmë deklaratë, do të presim përfundimin e hetimeve. Ka dy mundësi. Njëra është se ata janë rrëmbyer në Kosovë dhe janë transferuar në Serbi, dhe tjetra është se kanë kaluar kufirin dhe kanë përfunduar në Serbi. Është e qartë se ata nuk kanë pasur qëllim të jenë në Serbi dhe prandaj duhet të lirohen pa kushte”, tha Escobar.
Prokuroria më e lartë publike në Kraljevë ka njoftuar sot se janë arrestuar pjesëtarët e policisë së Kosovës.
Prokuroria ka lëshuar urdhër për kryerjen e hetimeve ndaj tre policëve të Kosovës nën dyshimin se kanë kryer veprën penale të prodhimit, mbajtjes, mbajtjes dhe trafikimit të paligjshëm të armëve dhe lëndëve plasëse./teve1.info/
