Kur kanë mbetur më pak se dy javë nga afati i Qeverisë së Kosovës deri kur serbët e Kosovës duhet t’i kthejnë targat ilegale në “RKS”, i dërguari i posaçëm i Shteteve të Bashkuara për Ballkanin Perëndimor, Gabriel Escobar, do ta nis një raund të ri bisedimesh me liderët politikë në Prishtinë.
Vizita u konfirmua nga zyra e presidentes Vjosa Osmani.
Tëvë1 merr vesh se pas presidentes, emisar special i ShBA-së për dialogun Kosovë – Serbi, do ta takojë edhe kryeministrin e vendit Albin Kurtin. E burimet brenda opozitës bëjnë të ditur se Escobar do të ketë takime edhe me liderët e partive opozitare.
Profesori universitar Arben Fetoshi, thotë se ardhja e emisarit amerikan tregon për që bashkësia ndërkombëtar po synon që ta përfundoi sa më shpejtë procesin e dialogut.
“Besoj që edhe vizita e zotëri Escobar është e ngjashme me vizitat e shpeshta edhe të ndërmjetësit të Bashkimit Evropian zotëri Lajçak dhe që reflekton përkushtimin e Shteteve të Bashkuara të Amerikës dhe Bashkimit Evropian, që në mënyrë të dakorduar, pra konsensuale t’i qasen përmbylljes sa më të shpejtë të dialogut, ndërmjet Kosovës dhe Serbisë”, vlerësoi Fetoshi.
Burimet e tëvë1 bëjnë të ditur se të enjten në Kosovë do të vije përsëri emisari i BE-së, Miroslav Lajçak, i cili për vizitë në Prishtinë ishte në javën e kaluar. Ndërsa, Escobar për herë të fundit e vizitoi Kosovën më 24 gusht.
Ditë më parë, ambasadori amerikan në Prishtinë, Jefry Hovenier e sugjeroi kryeministrin Albin Kurti që të shtyjë edhe për një kohë, zbatimin e vendimit për targat.
Kronika e gazetarit Valmir Gallopeni.
