Emisari i Shteteve të Bashkuara të Amerikës për Ballkanin Perëndimor, Gabriel Escobar ka thënë se Kosova është tërhequr nga një ushtrim i rëndësishëm ushtarak dhe “si reagim ndaj kësaj kërkojmë mënyra të tjera të partneritetit me një nga aleatët tanë më të përafërt në rajon”.
Escobar ka thënë se janë të brengosur me mungesën e përafrimit të Kosovës jo vetëm me ShBA-në por edhe me komunitetin transatlantik.
“Sfida e Kosovës që të jetë pjesë e BE-së dhe NATO-s është mosnjohja e pesë vendeve të BE-së. Na duhet një rrugëtim evropian, por mbështesim fuqishëm procesin për përafrimin e palëve. Jemi ndër garantuesit më të mëdhenj të sigurisë në Kosovë. Unë shkoj në Mitrovicë, atje kam qenë në vjeshtën e kaluar. Flas me liderin e Listës Serbe në baza të rregullta. Kemi kontakt të konsiderueshëm me serbët e Kosovës… Ne do të punojmë me Qeverinë e Kosovës që t’i bindim që është në interesin e tyre të punojnë me SHBA-në, Mbretërinë e Bashkuar, NATO-n, BE-në, QUINT-in”, ka thënë ai.
Escobar ka thënë se kanë folur me pesë shtetet mosnjohëse të Kosovës, dhe sipas tij, një nga kërkesat e tyre është njohja bilaterale me Serbinë.
Ai ka thënë se presin vullnetin e mirë nga Kosova për implementimin e Asociacionit, ndërsa ka thënë se Asociacioni me mbështetjen amerikane siguron se ai nuk e shkelë Kushtetutën.
Escobar po ashtu ka thënë se do të ketë pasoja për Serbinë nëse serbët nuk marrin pjesë në zgjedhjet në veri.
