Shtetet e Bashkuara të Amerikës presin përparime të dukshme në zbatimin e marrëveshjes mes Kosovës dhe Serbisë në takimin e radhës që do të mbahet pas dy javësh në nivel të kryenegociatorëve. I dërguari i posaçëm i Shteteve të Bashkuara për Ballkanin Perëndimor, Gabriel Escobar, gjatë një konference për media nga Brukseli, të cilën e zhvilloi përmes platformave online, tha se ka parë një përparim të vogël në takimin e 2 majit mes kryeministrit të Kosovës, Albin Kurti dhe presidentit të Serbisë, Aleksandar Vuçiq. Por, siç tha ai, pas arritjes së marrëveshjes në Ohër, tani duhet të vazhdohet me zbatimin e saj.
Escobar tha që pret të ketë një takim mes kryenegociatorëve Besnik Bislimi dhe Petar Petkoviq brenda dy javëve “për ta diskutuar këtë proces sërish”.
Vet takimi i 2 majit, mes Kurtit e Vuçiqit, tha Escobar, duhet të shihet në funksion të zbatimit pasi që marrëveshja tashmë është arritur.
SHBA-ja e BE-ja, nënvizoi Escobar, presin përparime të dukshme në takimin e radhës në nivel të kryenegociatorëve, që do të mbahet pas dy javësh.
“Sidomos Kosova duhet ta merr seriozisht këtë proces dhe ta çoj përpara atë, duke mos e parë procesin si të kthyeshëm prapa.
Escobar, u pyet në vazhdimësi në lidhje me draft-propozimin e Ekipit Menaxhues, ekip ky i afërt me presidentin serb Vuçiq dhe propozimin e kryeministrit Kurti, në anën tjetër në lidhje me statutin e Asociacionit të Komunave me Shumicë Serbe.
Escobar tha se të dy propozimet e statutit – të Kurtit dhe të ekipit menaxhues, të paraqitura në Bruksel – ishin serioze, por “nuk më takon mua të vendos nëse është serioz, nuk është një proces i ndërmjetësuar nga Amerika, por proces i ndërmjetësuar nga Evropa”.
“Ne shohim një evolucion në të dyja anët, në njërën anë e pamë draftin e Ekipit Menaxhues e në anën tjetër i dëgjuam edhe parimet e prezantuara nga Qeveria e Kosovës, mbi të cilat e shohin se si mund të themelohet Asociacioni”, tha Escobar.
“Pra, kemi një përparim të vogël në prezantimet nga të dyja palët se si e shohin asociacionin. Tash presim që në takimin e radhës pas dy javësh të ecet përpara”, tha diplomati amerikan.
Sipas tij, asociacioni mund të shihet edhe si instrument për garantimin e të drejtave të komunitetit serb.
“Marrëveshja nuk është për fitues e humbës, ajo i bën të dyja palët të fitojnë dhe dërgon drejt normalizimit”, tha Escobar, duke përsëritur se SHBA do të insistojë që marrëveshja e arritur të zbatohet.
