Escobar në një intervistë për mediumin serb N1, tha se askush nuk duhet të vritet apo lëndohet për shkak të targave.
Kur është pyetur nëse ka potencial për përshkallëzim të konfliktit me një shtator apo ditëve në vijim, kur Qeveria e Kosovës planifikon të vendos reciprocitet ndaj Serbisë për çështjen e targave të automjeteve dhe dokumentacionit, Escobar ka thënë: “Shpresoj që jo”.
Ai tha se janë duke punuar për siguri dhe stabilitet në Kosovë dhe regjion.
“Shpresoj njerëzit ta kuptojnë që askush nuk duhet të vritet apo lëndohet për shkak të tabelave të automjeteve. Megjithatë, pa marrë parasysh nga ajo që shpresojmë, ne në mënyrë të koordinuar jemi duke punuar për siguri dhe stabilitet në Kosovë dhe regjion. KFOR-i është prezent, EULEX-i është prezent dhe kemi bashkëpunim të ngushtë me dy qeveritë dhe po përpiqemi që të zgjidhim mosmarrëveshjet mes tyre, përpara se të rriten tensionet që mund të eskalojnë në një konflikt. Dhe, shpresoj që kjo nuk do të ndodh”, ka deklaruar Escobar.
