Presidenti turk, Recep Tayyip Erdogan, u zotua të mërkurën se nuk do të tërhiqet asnjë hap prapa nga të drejtat e tyre si myslimanë mbi Jerusalemin Lindor.
“Ne nuk do të lejojmë që Jerusalemi të ndotet nga duar të papastra, megjithëse e di që pakënaqësia e admiruesve të Hitlerit mund të mos zbehet kurrë”, tha Erdogan në ceremoninë e hapjes së ndërtesës së re të Ministrisë së Jashtme turke në Ankara, raporton Anadolu.
Erdogan theksoi mbështetjen e palëkundur për Gazën, duke thënë: “Askush nuk mund të na pengojë të qëndrojmë pranë popullit të shtypur të Gazës që po lufton për të mbijetuar nën sulmet brutale të Izraelit”.
“Ne do të qëndrojmë të vendosur sot dhe nesër kundër atyre që kërkojnë ta shndërrojnë rajonin tonë në një det gjaku dhe atyre që nxisin paqëndrueshmëri në gjeografinë tonë”, tha ai.
Presidenti turk riafirmoi gjithashtu se Ankaraja do të vazhdojë të mbetet në solidaritet të plotë me ata që janë shënjestruar nga banditizmi izraelit, nga Siria në Jemen, nga Libani në Katar.
“Ata që besojnë se mund të ndërtojnë një të ardhme të sigurt me shtypje dhe gjenocid me koston e jetës së fëmijëve të pafajshëm, do të mbyten në gjakun që kanë derdhur”, ka shtuar Erdogan.
