Presidenti i Turqisë, Rejep Tayip Erdogan, të mërkurën nënvizoi rëndësinë e zbatimit konkret të shpërbërjes së organizatës terroriste PKK, duke theksuar se ky proces duhet të ndiqet me vëmendje.
Gjatë një takimi me grupin parlamentar të partisë së tij, Erdogan deklaroi se Shërbimi Kombëtar i Inteligjencës do të mbikëqyrë nëse zotimet e bëra do të realizohen në praktikë, shkruan TRT global.
Ai theksoi se me vendimin e PKK-së për t’u shpërbërë dhe për të hequr dorë nga armët, vendi po hyn në një periudhë të re drejt një “Turqie pa terror”.
“Koha e terrorit, dhunës dhe veprimeve të paligjshme ka përfunduar”, deklaroi presidenti turk.
Erdogan gjithashtu kërkoi që edhe fraksionet e PKK-së në Siri dhe në Evropë të pranojnë realitetin e ri dhe të marrin pjesë në procesin e çarmatimit dhe shpërbërjes, duke përmendur konkretisht grupin YPG në Siri.
