Presidenti turk, Rexhep Tajip Erdogan dhe presidenti rus, Vladimir Putin zhvilluan një bisedë telefonike të dielën, ku u diskutua mundësia e rifillimit të bisedimeve të paqes mes Rusisë dhe Ukrainës, duke u rikthyer në vendin ku ato u ndërprenë – Stambollin.
Erdogan shprehu kënaqësinë për gatishmërinë e Putinit për të rifilluar negociatat e paqes dhe theksoi se Turqia mbetet e gatshme të presë dialogun që synon një zgjidhje të qëndrueshme të konfliktit.
Erdogan theksoi se ka një dritare të re mundësie për arritjen e paqes dhe se një armëpushim i përgjithshëm do të ishte hapi i parë i domosdoshëm për këtë proces, shkruan agjencia Anadoly.
Nga ana e tij, Kremlini konfirmoi se Turqia është e përgatitur të ofrojë mbështetje logjistike dhe diplomatike për organizimin e negociatave. Po ashtu, biseda përfshiu interesin e ndërsjellë për zgjerimin e bashkëpunimit ekonomik, përfshirë projekte të përbashkëta energjetike.
Kjo telefonatë ndodhi pas deklaratës së Putinit në një konferencë shtypi në Moskë, ku propozoi që bisedimet e reja me Kievin të mbahen në Stamboll duke nisur nga e enjtja.
Stambolli më herët ka shërbyer si vendpritës për raunde bisedimesh në mars 2022, të cilat nuk çuan në ndonjë marrëveshje përfundimtare.
Turqia ka ruajtur marrëdhënie të mira si me Rusinë, ashtu edhe me Ukrainën, dhe ka ofruar disa herë ndërmjetësim për paqe.
Ndërkohë, presidenti ukrainas Volodymyr Zelenskyy reagoi ndaj propozimit të Putinit duke deklaruar se Ukraina është e hapur për bisedime të drejtpërdrejta, me kusht që Rusia të përkushtohet ndaj një armëpushimi të plotë dhe të besueshëm, duke filluar që nga e hëna.
