Ministri i Kulturës, Hajrullah Çeku ka shprehur keqardhje pasi sipas tij, Epopeja e Ushtrisë Çlirimtare të Kosovës po keqpërdoret për qëllime të sulmeve politike.
Këtë deklaratë Çeku e bëri në Kuvendin e Kosovës duke iu referuar lajmeve të përjashtimit të Komunës së Skenderajt nga organizimet për Epopenë e UÇK-së.
Për këtë çështje ministri tha se i janë dërguar Komunës së Skenderajit thirrje, mesazhe e kërkesa të panumërta për bashkëpunim por sipas tij, nuk ka pasur përgjigje nga ana e tyre.
“Në vendimin për themelimin e komisionit shtetërorë parashihet edhe krijimi i grupeve të veçanta dhe të ftohen edhe anëtarë dhe institucione të tjera sipas nevojës. Për këtë qëllim e kemi kontaktuar edhe Komunën e Skenderajt për të bashkëpunuar rreth aktiviteteve për shënimin e Epopesë së Ushtrisë Çlirimtare të Kosovës. Komisioni ka siguruar buxhetin e nevojshëm dhe i kemi ofruar të gjithë gatishmërinë tonë për bashkëpunim në lidhje me aktivitetet e Epopesë së UÇK-së. Kërkesa, imelle, thirrje e mesazhe të panumërta për një kohë të gjatë drejtuar zyrtarëve të komunës. Për fat të keq kërkesa dhe thirrjet tona kanë mbetur pa përgjigje. Megjithatë aktivitetet që lidhen me epopenë po organizohen dhe do të organizohen deri në fund përfshi edhe natën e zjarreve dhe koncertin që mbahen sonte në sheshin e qytetit të Skenderajt”, tha Çeku.
Derisa theksoi se nuk ka asnjë lloj vullneti për përjashtim përkundrazi sipas tij, Ministria që ai e udhëheq ka pasë nevojë edhe për ndihmën e Komunave për realizimin e këtyre aktiviteteve.
“Nuk ka asnjë lloj përjashtimi, nuk ka asnjë lloj vullneti për ta larguar dikë, përkundrazi ne kemi pasë nevojë për ndihmën e komunës për me i realizu sa më mirë këto aktivitete. Por ato do të bëhen edhe pa përfshirjen e Komunës së Skenderajt. Më duhet të shpreh keqardhjen time që një ngjarje kaq e rëndësishme për kombin tonë sikurse Epopeja e UÇK-së, të përdoret, respektivisht të keqpërdoret për qëllime të sulmeve politike”, shtoi ministri Çeku./teve1.info./
