Gjashtë gëzhoja janë gjetur dhe sekuestruar nga Policia e Kosovës, në rrugën “Fatime Hetemi” në Mitrovicë, ku mëngjesin e së premtes, si pasojë e të shtënave me arme zjarri një person u plagos dhe më pas ndërroi jetë në QKUK.
Këtë për tëvë1.info e ka konfirmuar zëdhënësi i policisë për rajonin e Mitrovicës, Avni Zahiti.
Zahiti, po ashtu, ka thënë se hetimet për identifikimin dhe arrestimin e të dyshuarit janë duke vazhduar në koordinim me prokurorin e rastit.
“Sot, rreth orës 09:42, policia në Mitrovicë, ka pranuar informatën për të shtëna me arme zjarri në rrugën ‘Fatime Hetemi ’ në Mitrovicë. Nga informatat e para nga vendi i ngjarjes, ishte bërë e ditur se një person i dyshuar kishte shtënë me armë në drejtim të viktimës F. Z., 45 vjeçar, i cili fillimisht është dërguar në Spitalin Rajonal në Mitrovicës, më pas ishte dërguar në Shërbimin Spitalor Klinik Universitar te Kosovës “SHSKUK ”. Ndërsa, rreth orës 12:00 nga SHSKUK- ja, është raportuar se i plagosuri viktima ka ndruaj jetë. Me urdhër te Prokurorit, trupi i pajete i viktimës është dërguar në IML, për obduksion. Nga hetimet e zhvilluara në vendin e ngjarjes si dhe ekzaminimet e kryera, hetuesit policor si prova materiale kanë gjetur dhe sekuestruar gjashtë gëzhoja. Rrjedha hetimore është duke vazhduar në koordinim me prokurorin e rastit në drejtim të identifikimit dhe arrestimit të të dyshuarit dhe zbardhjes së plotë të të gjitha rrethanave që ndërlidhen me rastin e veprës penale vrasje”, ka thënë Zahiti./teve1.info/
