Caktimi i dy emisarëve gjerman e francez, për dialogun Kosovë – Serbi, po vlerësohet si rritje e presionit ndërkombëtar diplomatik.
Kjo po shihet si dinamizim i BE-së për çështjen e dialogut, nga njohës të zhvillimeve politike.
Si e domosdoshme po vlerësohet vënia e kontaktit e Qeverisë së Kosovës me dy emisarët e rinj.
Përpos se e mirëpresin vendimin gjermano – francez, nga Qeveria e Kosovës nuk kanë njoftuar nëse e kanë në plan një takim me ta.
“Kryeministri e ka mirëpritur këtë angazhim dhe përkushtim shtesë të dy shteteve të rëndësishme të Bashkimit Evropian dhe mbështetëse të Kosovës në arritjen e marrëveshjes ligjërisht të obligueshme për normalizim të plotë të marrëdhënieve me njohje reciproke në qendër. Kryeministri ndan gjithashtu mendimin se normalizimi i plote i marrëdhënieve ndërmjet Kosovës dhe Serbisë është i rëndësisë së veçantë për rajonin e Ballkanit Perëndimor dhe se qeveria është e përkushtuar për dialog parimor për marrëveshje ligjërisht të detyrueshme me njohje reciproke në qendë”, ka thënë zëdhënësi i Qeverisë, Përparim Kryeziu.
Përmes një letre dërguar kryeministrit të Kosovës, Albin Kurti dhe presidentit të Serbisë, Aleksandër Vuçiq, Macron dhe Scholz bënë thirrje për vendosmëri dhe gatishmëri maksimale për vendime të vështira, në kuadër të dialogut.
Kronika e realizuar nga Florijeta Dernjani
