Edhe këtë vit, Ministria e Arsimit ka vendosur që të subvencionojë prindërit për blerjen e teksteve e mjeteve shkollore.
Por sikurse edhe vitin e kaluar, shumë prindër që nuk i plotësuan kriteret tentuan t’i marrin parat nga ky institucion.
Megjithatë sipas MASHTI-t, 4 mijë e 532 aplikime janë refuzuar nga koordinatorët e shkollave të cilët këtë vit janë duke verifikuar çdo aplikim.
E vetëm në shkollën “Mihal Grameno” në Fushë Kosovë mbi 70 raste të tilla janë refuzuar nga koordinatori për aplikim dhe subvencionim të teksteve shkollore nga mbi 1 mijë e 600 që kanë aplikuar.
Madje kishte raste kur prindërit që kishin dal jashtë Kosovë aplikuan t’i marrin mjetet.
“Numri është i vogël krahasim me aplikimet dikun afër 70 aplikime janë refuzuar për arsye se listat janë vonuar nga ankesat që na kanë dërguar. Ata që largohen nga shkolla jonë i heqim nga lista dhe ata janë refuzu. Ata të cilët janë në listën tonë normalisht që i pranojmë”, tha koordinatori për aplikim dhe subvencionimin e teksteve, Kushtrim Mehmeti.
Njëjtë ndodhi edhe në shkollën “Daut Bogujevci” në Fushë Kosovë.
“Ka problem edhe gjatë aplikimit dmth prindërit nuk janë të vetëdijshëm kur aplikojnë por bashkë me stafin e shkollës mundohemi një aplikim me të lehtë. Ka raste edhe kur refuzohen kemi pra disa raste, pra janë raste kur ata fëmijë kanë emigruar jashtë vendit dhe kanë bërë aplikim prindërit e tyre. Përafërsisht janë tetë raste , por ndoshta janë rritur sot gjatë ditës ani pse ne jemi hala në verifikim”, tha sekretari i shkollës, Betim Ahmeti.
E sfiduese sipas Ahmetit ende mbetet furnizimi i gjithë fëmijëve me tekstet shkollore.
“Të pajisja me libra është e vështirë akoma, kemi nxënëse që nuk janë të pajisur ende me libra poashtu ka edhe vonesa të vendosjes së mjeteve nga MASHTI”.
Sipas raportit të Zyrës Kombëtare të Auditimit, mbi 60 mijë euro vitin e kaluar i janë dhënë prindërve që nuk i kanë plotësuar kriteret për të përfituar subvencion nga Ministria e Arsimti.
