Për dy ditë radhazi, zhvilluan gara.
E të premten, me përfundimin e tyre u mblodhën në kazermën “Adem Jashari”.
Aty u shpall ushtari më i mirë i këtij viti.
Nga vendorët, vendin e parë e mori Elvis Çitaku.
“Gara ka qenë mjaft sfiduese, pjesëtarët kanë qenë të përgaditur gjithë dhe ka qenë ndjenjë e mirë me marr pjesë dhe ndjenjë ma e mirë me fitu garën”, deklaroi ushtari, Elvis Çitaku.
Pjesëmarrës ishin edhe ekipe ushtarake nga vendet e NATO-s dhe shteteve partnere.
Nga ndërkombëtarët, vendi i parë u fitua nga Shqipëria.
“Gara shkoi shumë mirë, konkurenca ishte shumë e fort, mirëpritja ishte e mirë. Çdo gjë ishte transparente. Faleminderit ekipeve të FSK-së për organizimin”, tha ushtari Hil Mala.
I pranishëm do të duhet të ishte edhe gjenerali i FSK-së, Bashkim Jashari.
Por në emër të tij u përçuan disa mesazhe për ushtarët.
“Jam këtu me ju përshëndetë të gjithëve juve. Me ju përgëzu të gjithëve për punën, angazhimin edhe dedikimin të cilin e keni pas gjatë krejt kësaj kohe që nga faza e planifikimit, kordinimit dhe ekzekutimit. Prandaj i keni fjalët më të mira prej komandantit të forcës së sigurisë së Kosovës, general Bashkim Jashari”, tha koloneli në FSK, Astrit Haliti.
Ndërsa për rreshtermajorin e FSK-së, Ilir Rama, kjo garë ishte dëshmi e nivelit të lartë të profesionalizmit të ushtarëve.
“Ky aktivitet dyditor përfaqëson thelbin e profesionit ushtarak, diciplinës, qëndrushmërisë, vendosshmërisë dhe përgaditjes për çdo sfidë operacionale. Gjatë këtyre dy ditëve intensive pjesëmarrësit janë testuar në kufinjtë e tyre fizik dhe psikologjik. Duke dëshmuar nivel të lartë të profesionalizmit, qëndrushmërisë dhe përkushtimi ndaj detyrës” , tha Rama.
Në këtë garë që u zhvillua në Ferizaj morën pjesë gjithsej 44 pjesëtarë, prej tyre 22 nga vendet partnere të Kosovës dhe 22 nga Forca e Sigurisë së Kosovës.
Ekipet pjesëmarrëse në garën për “Ushtarin më të Mirë 2026” iu nënshtruan 10 disiplinave të ndryshme, ku qëllimi ishte sfidimi i shkathtësive fizike e ushtarake.
