Zëvendësdrejtori i Policisë së Kosovës për rajonin e veriut, Veton Elshani ka thënë se policët që e zhveshin njëherë uniformën e policisë nuk duhet të rikthen përsëri.
Kjo pasi sipas tij, ata mund të bëjnë një gjë të tillë prapë.
Tutje, Elshani ka thënë se ky vendim nuk duhet të vlejë vetëm për serbët që kanë dhënë dorëheqjen, por edhe për nacionalitete tjera.
“Kemi disa kërkesa që më u rikthyer gjenerata e fundit, sidoqoftë kjo nuk vendoset nga unë, por nga menaxhmenti më i lartë, pra drejtori i përgjithshëm i policisë…Deri tani kemi 3 kërkesa, një është kthyer edhe dy janë në pritje…Mendimi im profesional është që ata nuk duhet më u rikthy në punë kurrë. D.m.th policit nëse i bëhet një presion shumë i madh unë e kuptojë diqysh, por në momentin që ti e dorëzon ID e policisë dhe mësohesh me e zhvesh uniformën mësohesh më leshu prapë për një pagë më të mirë. Nuk po flas vetëm për serbët, por për të gjithë”, ka deklaruar ai në emisionin “Ditari” në Tëvë1.
Rreth 550 policë serbë në veri – në komunat Mitrovicë e Veriut, Zveçan, Leposaviq dhe Zubin Potok – patën dhënë dorëheqje kolektivisht nga Policia e Kosovës në nëntor të vitit të kaluar, si shenjë proteste ndaj vendimit të Qeverisë së Kosovës për regjistrimin e makinave me targa ilegale serbe në RKS – Republika e Kosovës.
Ndërsa, dorëheqje të disa policëve të rinj ka pasur edhe në muajin gusht të këtij viti.
Presidentja Vjosa Osmani ka thënë se dorëheqja e tyre është rezultat i kërcënimeve të dhe frikësimeve të vazhdueshme nga Serbia./teve1.info
