Themeluesi i Tesla është liruar nga akuza për një postim në Twitter, në të cilin ai tha se kishte “siguruar fonde” për të privatizuar prodhuesin e veturave elektrike.
Musk u përball me një padi grupore të ngritur në emër të aksionarëve të Tesla, të cilët thanë se ai i kishte “mashtruar” ata me postimet e tij në gushtin e vitit 2018.
Blerja e propozuar prej afro 66.5 miliardë eurove (72 miliardë dollarësh-60 miliardë funte) nuk u realizua kurrë, raporton BBC, transmeton Telegrafi.
Nëse juria e San Franciskos do ta shpallte Musk-un fajtor, atëherë ai mund të urdhërohej që të paguante miliarda dollarë në emër të dëmit të shkaktuar.
Nëntë anëtarëve të jurisë iu deshën më pak se dy orë për të marrë vendimin e tyre të premten pasdite.
Elon – i cili donte që gjyqi të zhvendosej në Teksas, aty ku edhe është baza e Tesla, duke argumentuar se nuk mund të merrte një gjykim të drejtë në San Francisko – e mirëpriti rezultatin.
Duke përdorur profilin e tij në Twitter, platformën e rrjeteve sociale të cilën ai e bleu tetorin e kaluar, ai tha: “Falë Zotit, mençuria e njerëzve ka mbizotëruar në këtë gjykim!”.
“Unë jam thellësisht mirënjohës për vendimin unanim të jurisë për të shpallur pafajësinë time në çështjen e privatizimit ‘Tesla 420’”.
