Sekretari amerikan i Shtetit Marco Rubio u largua nga El Salvador të martën me një marrëveshje nga presidenti i atij vendi për të pranuar të dëbuar nga SHBA të çdo kombësie, përfshirë kriminelët e dhunshëm amerikanë të burgosur tani në Shtetet e Bashkuara.
Pas vizitës që kryediplomati amerikan, Marco Rubio pati në El Salvador, të martën ai u morr vesh me presidentin e atij vendi për të pranuar të dëbuarit nga SHBA të çdo kombësie, përfshirë këtu edhe krimininelët e dhunshëm amerikanë që gjenden në burgje.
Presidenti Nayib Bukele “ka rënë dakord për marrëveshjen më të paprecedentë e të jashtëzakonshme të migracionit kudo në botë,” tha Rubio pas takimit me Bukelen në shtëpinë e tij të fshatit buzë liqenit jashtë San Salvadorit për disa orë të hënën në mbrëmje, raporton AP.
“Ne mund t’i dërgojmë ata dhe ai do t’i vendosë në burgjet e tij,” tha Rubio për emigrantët e të gjitha kombësive të ndaluar në Shtetet e Bashkuara. “Dhe, ai është ofruar gjithashtu të bëjë të njëjtën gjë për kriminelët e rrezikshëm aktualisht në paraburgim dhe duke vuajtur dënimin e tyre në Shtetet e Bashkuara, edhe pse ata janë shtetas amerikanë ose banorë të ligjshëm.”
Rubio po vizitonte El Salvadorin për të bërë presion ndaj një qeverie mike që të bënte më shumë për të përmbushur kërkesat e Presidentit Donald Trump për një goditje të madhe ndaj imigracionit .
Bukele konfirmoi ofertën në një postim në X, duke thënë se El Salvador “i ka ofruar Shteteve të Bashkuara të Amerikës mundësinë për të transferuar një pjesë të sistemit të tij të burgjeve”. Ai tha se vendi i tij do të pranonte vetëm “kriminelët e dënuar” dhe do të ngarkonte një tarifë që “do të ishte relativisht e ulët për SHBA-në, por e rëndësishme për ne, duke e bërë të gjithë sistemin tonë të burgjeve të qëndrueshme”.
