Real Madridi ka fituar “El Clasicon” ndaj Barcelonës dhe është shkëputur në krye të tabelës. Madrilenët të dielën në stadiumin “Santiago Bernabeu”, fituan me rezultatin 3:1, në kuadër të xhiros së nëntë të La Ligës spanjolle.
Vendësit në pushim shkuan me dy gola epërsi. Karim Benzema në minutën e 12-të shënoi për 1:0, ndërsa rezultatin e dyfishoi uruguaiani Federico Valverde në minutën e 35-të.
Barcelona u kthye në lojë në minutën e 83-të me golin e Ferran Torresit. Dhe kur u hodh në sulm për ta barazuar rezultatin, Eric Garcia i mysafirëve shkaktoi penallti në Rodrygon. Rodrygo e mori vet përsipër ekzekutimin e penalltisë dhe ishte i saktë nga pika e bardhë në minutën e parë të kohës shtesë.
Pas nëntë xhirove, Real Madridi shkëputet në krye të tabelës me 25 pikë. Barcelona mbetet e dyta me tri pikë më pak.
