Policia e Kosovës ka realizuar dy ekstradime nga shtete të ndryshme drejt Kosovës, në bashkëpunim me institucionet e drejtësisë dhe autoritetet e vendeve përkatëse.
Sipas Policisë, të martën është ekstraduar nga Gjermania në Kosovë shtetasi kosovar M.T., ndaj të cilit ishte lëshuar urdhërarrest ndërkombëtar për dyshimin e përfshirjes në veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Pas ekstradimit, ai i është dorëzuar njësive përkatëse të Drejtorisë Rajonale të Policisë në Prishtinë për procedurat e mëtejshme ligjore.
Ndërkaq, më 13 gusht, nga Hungaria është ekstraduar në Kosovë shtetasi i Serbisë, I.S., i cili gjithashtu kërkohej me urdhërarrest ndërkombëtar për të njëjtën vepër penale.
Edhe I.S. pas ekstradimit i është dorëzuar njësive përkatëse të Policisë në Prishtinë për procedura të mëtejshme.
Policia e Kosovës ka bërë të ditur se këto ekstradime janë realizuar falë bashkëpunimit ndërmjet institucioneve të Kosovës dhe autoriteteve të Gjermanisë dhe Hungarisë.
Përmes Drejtorisë për Bashkëpunim Ndërkombëtar Policor (ILECU), Policia ka theksuar se do të vazhdojë bashkëpunimin dhe shkëmbimin e informacioneve me institucionet vendore, shtetet partnere dhe organizatat ndërkombëtare, me qëllim të parandalimit dhe luftimit të kriminalitetit ndërkufitar./teve1.info/
