Dezinformatat dhe propaganda ruse janë kërcënim serioz dhe i vazhdueshëm për kufijtë e Polonisë por edhe të vendeve tjera, thotë në një intervistë për KosovaPress Jakub Sliz, themelues organizatës polake për verifikimin e fakteve dhe edukatës mediatike (Pravda).
Si Kosova, ashtu edhe Polonia janë ndër shtetet më të ekspozuara ndaj dezinformatave ruse dhe serbe. Polonia, për shkak të afërsisë gjeografike me Rusinë dhe mbështetjes së saj të fortë për Ukrainën, është cak i vazhdueshëm i propagandës ruse. Nga ana tjetër, Kosova, për shkak të tensioneve me Serbinë, është vazhdimisht në shënjestër të fushatave dezinformuese që synojnë të dëmtojnë vendin në arenën ndërkombëtare.
Eksperti polak thotë se Kosova dhe Polonia mund të bashkëpunojnë në luftimin e propagandës ruso-serbe.
Russia Today, Telegrami por edhe aplikacioni WhatsApp, sipas Sliz, përdoren nga Rusia për përhapjen e lajmeve të rreme.
“Ka shumë ngjashmëri [mes Kosovës dhe Polonisë], veçanërisht duke ardhur nga Polonia, e cila është fqinje e Rusisë, mendoj se ka një mundësi për të bashkëpunuar, sepse ndajmë të njëjtën histori dhe të njëjtin armik”, thotë ai.
Për Poloninë, Jakub Sliz thotë se dezinformtatat ruse vazhdojnë të përbëjnë kërcënim pavarësisht teknikave që përdorin për luftimin e tyre.
“Problemi më i madh është se jemi nën presion të vazhdueshëm nga dezinformata ruse. Por nga ana tjetër, për shkak të faktit që jemi vazhdimisht të sulmuar, dhe për shkak të arsyeve historike, që kemi qenë nën pushtim, disi jemi mësuar me të dhe kuptojmë se si të përballemi me dezinformata ruse, kështu që mendoj se në shoqërinë tonë kemi një mekanizëm mbrojtës, gjyshërit tanë, prindërit tanë kanë jetuar në komunizëm, kështu që ata kuptojnë se çfarë është propaganda dhe dezinformata ruse. Pra, nga njëra anë, po, nga ana tjetër, ekziston ky kërcënim i vazhdueshëm në kufijtë tanë”, thotë ai.
Se Rusia shfrytëzon çdo mundësi për të përhapur propagandë, eksperti polak për verifikimin e fakteve, thotë se dëshmohet në shumë faqe interneti.
“Nëse flasim për situatën me Rusinë, sigurisht, ne polakët, duke folur në kuadrin e politikës më të përgjithshme, mbështesim Ukrainën, kështu që ka një pengesë ndërmjet nesh dhe Rusisë. Ne ndjehemi jashtë qasjeve, ndikimit të butë dhe kërcënimeve nga siguria kibernetike. Kështu e shohim ne ndërveprimin me Rusinë. Nëse flasim për diplomacinë, natyrisht për shkak të luftës i kemi prerë të gjitha lidhjet. Por në sferën e informacionit, shohim shumë procese, shohim shumë faqe lajmesh që promovojnë dhe shtyjnë propagandë, megjithëse ka shumë balance, për shembull në ‘Russia Today’. Shohim shumë përmbajtje që shtyhet përmes Telegram-it, përmes kanaleve WhatsApp dhe këtë e shohim shumë qartë”, tregon Sliz.
Ai tregon edhe dallimet mes Polonisë dhe Kosovës në mënyrën e të funksionuarit të mediave, e që sipas tij, ndikon edhe në luftimin e dezinformimit.
“Ka shumë sfida të ngjashme, teknikat ndryshojnë për shkak të faktit se në Ballkan konsumoni media në një mënyrë tjetër nga Polonia. Ne, për shembull, po orientohemi pak më shumë në mediat sociale. E di që mediat tradicionale janë ende një gjë shumë e madhe në Kosovë. Ekziston një dietë e ndryshme, por në fund të ditës, ushqimi nga i cili përbëhen gatimet e caktuara është i njëjtë. Nuk ka kaq shumë ndryshim nga këndvështrimi im”, thotë ai.
Së fundi, Serbia ka ndërhyrë është akuzuar se ka ndërhyrë edhe në zgjedhjet e fundit parlamentare në Kosovë, të mbajtura më 9 shkurt. Në një konferencë për media kryeministri në detyrë Albin Kurti ka thënë se “ka prova se Serbia ndërhyri drejtpërdrejt në zgjedhjet e 9 shkurtit.”
Përmabjtje manipuluese për zgjedhjet në Kosovë shpërndanë edhe mediat ruse. RT Ballkan dhe Sputnik Serbia, kanë publikuar një mori dezinformatash gjatë fushatës parazgjedhore në Kosovë, nga 11 janari deri më 9 shkurt.
