Mjaftoi një postim nga Donald Trump në platformën e tij Truth Social për ta marrë gjithë vëmendjen e medieve ndërkombëtare.
Presidenti amerikan është shprehur jashtëzakonisht kritik ndaj presidentit ukrainas, Volodymyr Zelensky, duke thënë për të se ka bërë një punë të tmerrshme përgjatë këtyre viteve.
Për me tepër Trump tha se Zelenksy është një “diktator pa zgjedhje”, andaj i ka kërkuar që të “veprojë më shpejt, apo do të mbetet pa shtet”.
Trump u shpreh i bindur se vetëm administrata e tij mund t’i jap fund luftës mes Rusisë dhe Ukrainës.
“Ndërkohë, ne po negociojmë me sukses një fund të Luftës me Rusinë, diçka që të gjithë pranojnë se vetëm ‘TRUMP’ dhe administrata Trump mund ta bëjnë. Biden nuk u përpoq kurrë, Evropa ka dështuar të sjellë paqen”, u shpreh Trump.
Në anën tjetër, Zelensky akuzoi administratën Trump për nxjerrjen e Moskës nga izolimi.
E pavarësisht kritikave të Trump ndaj partnerëve evropian, Presidenti francez Emmanuel Macron dhe kryeministri i Mbretërisë së Bashkuar Keir Starmer do të vizitojnë Uashingtonin javën e ardhshme për t’u takuar me presidentin amerikan, ku do të diskutohet për çështjen e luftës mes Rusisë dhe Ukrainës.
Që të dy liderët evropian këmbëngulin në mbështetjen e tyre të palëkundur ndaj Ukrainës.
Profesori nga Westminster University, Aidan Hehir, thotë se administrata Trump dëshiron që Ukraina t’ia dorëzojë Rusisë provincat lindore dhe Krimenë.
Sipas tij kjo do të ishte një marrëveshje shumë dëmshme për Ukrainën.
“Duket se administrata Trump dëshiron që Ukraina t’i jap Rusisë provincat lindore dhe Krimenë, të pranojë ato që janë tash nën kontrollin rus. Kjo do të prezantohet si marrëveshje për paqe. Ky do të ishte një poshtërim i madh për Ukrainën sepse do t’i ngjante Marrëveshjes së Mynihut të vitit 1938, kur Chamberlain lejoi Hitlerin të marrë një pjesë të Çekosllovakisë. Historia e ledhatimit të liderëve dhunues është ajo që duhet të na frikësojë neve. Ajo çfarë po ndodh me Ukrainën sot ka një jehonë të zymtë të viteve 1930-ta. Është një poshtërim moral edhe katastrofë strategjike”
SHBA-ja dhe Rusia kanë mbajtur një takim në Riad më 18 shkurt, në të cilin nuk u ftua Kievi, e as Evropa.
