Sipas tij, policëve duhet t’u rriten pagat dhe njëkohësisht t’u jipen edhe beneficione të tjera.
“Pikërisht këta zyrtarë janë të lënë anash nga shteti i Kosovës, nga institucioni politik i shtetit të Kosovës. Sepse këta zyrtarët të shtetit nuk kanë sigurim shëndetësor, këta zyrtarë të shtetit kanë probleme dhe pengesa në aspektin logjistik të shkuarjes dhe ardhjes në vendin e punës, këta zyrtarë të shtetit duhet t’u rritet paga, duhet t’u jipen edhe beneficione të tjera, që ne kështu mund të arrijmë që të jetë efikasiteti edhe efiçienca në mënyrë proporcionale me pagën që e kanë”, tha Shala në “Ditari” në Tëvë 1.
Lidhur me aksionin e së hënës kundër narkotikëve në Zveçan, ku zyrtarët policorë të vendit u sulmuan me 26 plumba me armë zjarri, Shala theksoi se për policët që operojnë në pjesën e kufirit mes Kosovës dhe Serbisë, shteti duhet që t’ua garantojë të gjitha kapacitetet teknike.
“Ose të mobilizojmë, të kemi një shtim më të madh të zyrtarëve në atë pjesë, pra mos të merremi shumë me politikë në Prishtinë, por të fokusohemi që Policia e Kosovës të ketë kushte më të mira…. Të miratohet sa më parë që është e mundur ligji për pensionim të parakohshëm për zyrtarët policorë, sepse deri tani në aspektin statistikor, Policia e Kosovës është më e vjetra në rajonin e Ballkanit Perëndimor”, tha Shala.
Eksperti i sigurisë shtoi se policët e brezit kufitar do të duhej të ishin policë të rinj, e jo mbi moshën 50 vjeç. /Teve1.info/
