Eksperti i sigurisë, Arben Fetoshi, ka reaguar lidhur me zhvillimet e fundit në veri të Mitrovicës, duke pretenduar se veprimet e fundit janë pjesë e një operacioni të koordinuar nga Serbia për të ndikuar në situatën e sigurisë dhe integritetin e procesit zgjedhor në Kosovë.
Fetoshi ka lidhur incidentin e fundit që ka shënjestruar simbolin “I love Mitrovica” me atë që ai e cilëson si përpjekje të Serbisë për të krijuar tensione në prag të zgjedhjeve të 7 qershorit.
Sipas tij, një plan i mëhershëm për të shkaktuar incidente gjatë samitit BE–Ballkani Perëndimor në Tivat është penguar nga autoritetet malazeze, ndërsa pas këtij dështimi fokusi është zhvendosur në veriun e Kosovës.
Fetoshi pretendon se strukturat serbe dhe shërbimet e sigurisë kanë aktivizuar provokime në veri me synim mobilizimin e komunitetit serb përmes narrativave nacionaliste dhe paraqitjes së zhvillimeve lokale si sulm ndaj identitetit të tyre.
Ai e lidh këtë qasje me projektin e ashtuquajtur “Bota Serbe”, duke argumentuar se zhvillimet e fundit rajonale, përfshirë diskutimet për përshpejtimin e integrimit të Ballkanit Perëndimor në Bashkimin Evropian dhe mbështetjen ndërkombëtare për Kosovën, kanë ngushtuar hapësirën e veprimit për politikën zyrtare të Beogradit.
Sipas Fetoshit, mobilizimi i punonjësve të strukturave paralele në sektorët e arsimit dhe shëndetësisë në veri përbën një operacion hibrid me synim cenimin e rendit publik dhe ndikimin në procesin zgjedhor.
“Për këtë arsye, Aleksandër Vuçiq orkestroi “mbështetjen” nga Maqedonia e Veriut me mesazhe nacionaliste kundër Kosovës, artikuloi qartë objektivin për ta kontrolluar votën e çdo serbi në Kosovë përmes Listës Serbe dhe planifikoi sabotimin e BE-së në Tivat, për ta sfiduar Podgoricën si aleate të NATO-s”, ka shkruar ai në Facebook.
