Kështu në bursën hungareze të energjisë të cilën Kosova e ka referencë, çmimi i megavatit më 30 gusht kishte shkuar deri në 1047 euro.
Megjithatë të martën gjatë ditës në Hupx, çmimi mesatar i megavatit u soll mes 175 euro e 275 euro.
Njohësit e fushës së energjetikës po vlerësojnë se këto çmime kanë pësuar rënie për shkak të motit me diell dhe rritjes së ofertës, si dhe nuk pritet të ndikojnë në zbutjen e krizës.
Profesori universitar, Vezir Rexhepi vlerëson se deri këto çmime ka ardhur pasi fuqitë e mëdha i kanë ngritur kapacitetet prodhuese.
“Se faktori i parë që unë e shoh në këtë aspekt për ulje/ngritje të çmimeve është kërkesa dhe oferta. Pra nga ky aspekt këto vendet e mëdha për shembull i kanë rrit në njëfarë mënyre apo tjetër dhe i kanë mobilizu ato kapacitetet edhe mëhershme por edhe të tanishme kështu që oferta është ndonëse pak më e madhe sesa kërkesa. Faktor tjetër janë edhe kushtet klimatike”, vlerësoi Rexhepi.
Megjithatë, Dardan Abazi nga INDEP vlerëson se me rritjen e kërkesës gjatë dimrit situata do të ndryshojë për të keq.
“Në muajt në vazhdim pritet të ketë edhe kërkesë më të lartë për energji elektrike nga ana e konsumit të brendshëm e cila do t’i bëjë presion sistemit që t’i duhet të bëjë import me çmime të larta të energjisë… Në qoftë se nuk do të kemi ulje drastike të çmimeve të importit, që ne nuk presim as nuk besojmë, reduktimet do të jenë gati të domosdoshme”, u shpreh ai.
Abazi jep disa ide se si mund të evitohet një dimër i rëndë.
“Mendojmë që sa më parë të themelohet një Program Kombëtar i Efiçiencës… Është koha që përmes fondit të efiçiencës të themelohet një fond 500 milionësh apo më shumë për masat e efiçiencës të dedikuara sidomos për objektet kolektive”, shtoi ai.
Një analizë e publikuar së fundmi vlerëson se Kosova është e varur 30 % nga importi i energjisë.
Kronika e gazetarit Gojart Jashari.
