othuajse 9 në 10 të rritur kanë shenja të një sëmundjeje të re dhe të rrezikshme që po përhapet në heshtje, paralajmërojnë mjekët në SHBA. Bëhet fjalë për sindromën kardiovaskulare-renal-metabolike, e njohur si CKM. Sipas të dhënave, më shumë se 80% e të rinjve dhe të rriturve në moshë të mesme shfaqin shenja të hershme të kësaj sindrome, duke u ekspozuar ndaj rrezikut të infarktit, insultit, dështimit të zemrës dhe vdekjes së parakohshme nëse nuk merren masa në kohë.
Sindroma CKM nuk është një sëmundje e vetme, por një zinxhir problemesh shëndetësore që lidhen mes tyre, përfshirë tensionin e lartë, sheqerin në gjak, kolesterolin e pashëndetshëm, mbipeshën, obezitetin dhe funksionin e dëmtuar të veshkave. Kur një prej këtyre faktorëve përkeqësohet, ai ndikon drejtpërdrejt edhe te të tjerët, duke rritur ndjeshëm rrezikun për pasoja fatale.
Ekspertët theksojnë se trajtimi i këtyre problemeve të ndara nuk mjafton më dhe se qasja e re synon zbulimin e hershëm dhe një kujdes të koordinuar mes mjekëve të familjes, kardiologëve, nefrologëve dhe endokrinologëve.Të dhënat tregojnë se rastet e tensionit të lartë dhe diabetit janë në rritje, ndërsa obeziteti po shtohet veçanërisht tek fëmijët dhe adoleshentët.
Në të njëjtën kohë, rreth gjysma e të rriturve kanë tashmë një formë të sëmundjes kardiovaskulare, e cila mbetet shkaku kryesor i vdekjeve. Megjithatë, mjekët thonë se situata mund të përmbyset. Ndryshimet në stilin e jetesës, ushqyerja e shëndetshme, aktiviteti fizik, gjumi i mjaftueshëm dhe kontrolli i peshës konsiderohen armët kryesore për të frenuar këtë kërcënim të heshtur. Studimet tregojnë se zbatimi i këtyre masave mund të parandalojë deri në 40 për qind të vdekjeve të lidhura me zemrën dhe sëmundjet metabolike.
