Një operacion i Policisë së Kosovës, me asistencën e Doganës, ka rezultuar me një gjetje të armëve, bluza dhe maica të mbushura me simbole nacionaliste serbe në veri.
Autoritetet nuk kanë dhënë ende detaje për numrin e armëve dhe llojin e simboleve të gjetura, por theksojnë se operacioni është në vazhdim.
Ekipi i Tëvë1 nga atje ka bërë të ditur se operacioni është realizuar afër kampit “Nothing Hill” te baza e KFOR-it.
Përveç mallit të kontrabanduar dhe veshmbathjeve nacionaliste serbe, Dogana e Kosovës ka nisur të konfiskojë tashmë edhe me dhjetëra pije alkoolike dhe pajisje për përpunimin e saj.
Ky mall i kontrabanduar është gjetur brenda një lokali në fshatin Jashanicë të Leposaviqit, i cili është ndërtuar ilegalisht.
Operacioni është konfirmuar edhe nga ana e Policisë.
Zëvendësdrejtori i veriut, Veton Elshani ka bërë të ditur se për këtë operacion tashmë është njoftuar edhe Prokuroria Speciale.
“Rreth orës 12 jemi njoftu nga Njësitet e Policisë Kufitare se në një lokal në zonën e Leposavicit shiten pije, logo, maica, elektroshok etj. Lidhur me rastin Njësiti i Hetimeve Rajonale ka dal në vendin e ngjarjes, aty ka asistu edhe Dogana ndërsa për shkak të mbishkrimeve dhe gjërave të tjera që janë gjetë aty është njoftu edhe Prokuroria Speciale. Deri tani nuk kemi persona të arrestuar dhe bastisja ende është në vazhdim. Pas përfundimit të saj dhe intervistimeve të nevojshme, në bashkëpunim me Prokurorin e rastit do të dijë se si të veprojmë tutje”, deklaroi ai për Tëvë1.
