Televizioni Tëvë1 ka siguruar pamjet e momentit kur FSK-ja ngatërron rrugën dhe futet gabimisht në veri, konkretisht në Lagjen e Bonjakëve në Mitrovicë të Veriut.
Më pas, është zëvendësdrejtori i Policisë së Kosovës për veriun, Veton Elshani, ai i cili i orienton për të dalë nga veriu drejt jugut.
FSK, e cila duhet të marrë leje nga misioni i NATO-s në Kosovë për të lëvizur në këtë pjesë të vendit atë ditë tha se incidenti ndodhi rreth orës 10:30 të së enjtes, gjatë lëvizjes së konvojit nga Istogu për në kazermën e FSK-së në Mitrovicë.
Prania e FSK-së në veri të vendit është e mundur vetëm me pëlqimin paraprak të misionit paqeruajtës të NATO-s në Kosovë, KFOR, bazuar në zotimin e vitit 2013 nga Qeveria e Kosovës ndaj NATO-s.
Për herë të fundit, pas koordinimit me KFOR-in, FSK ishte në korrik të këtij viti në Ujman, për të ndihmuar në nxjerrjen e trupit të një mërgimtari nga uji. /teve1.info/
